Жамшид Муслимов: Фашизм ва нацизм бир нарса эмас

Шу десангиз йиғилиб қолган гапларим бор.

Немис фашистлари ютганда яхши бўлар эди, Гитлерчиларнинг Ўрта Осиё учун хатари йўқ эди деган фикрга муносабатим:

Фашизм ва нацизм бир нарса эмас, аммо бир бири билан туташган, бири иккинчисини тақозо қиладиган қарашлар тизимидир. Бу қарашлар жаҳонда ғайриинсоний, хавфли ва салбий оқибатлрага олиб келадиган ғоялар эканлиги тан олинганлиги тўғри. Гитлерчилар ғолиб бўлганда Осиё мамлакатларни ўз ҳолига ташлаб қўйишига ишонмайман. Камида ўзбеклар нацизми, орийлар ирқчилиги, қозоқлар фашизми каби деструктив оқимлар устунлик қилиши ва ҳудудимизда қирғинбарот биродаркуш урушлари бўлиб ўтиши мумкин эди, чунки фашизм/нацизм ғалаба келтирувчи тренд мафкурага айланиб қоларди.

Милитаристик гитлерчи империянинг марказий осиёга манфаати ҳеч бўлмаса пахтада бўлар эди. Пахта нафақат трикотаж ёки текстил заҳира манбаи балки ўт кукуни (порох) ишлаб чиқариш учун муҳим моддадир. Ундан ташқари уран, олтин ва бошқа ресурсларга иштаҳалари карнай бўлган бўлар эди, ва бу йўлда улар маҳаллий аҳоли билан ортиқча чиқишиб ўтиришмас эди.

Мен фақат энг оддий салбий оқибатларини айтиб ўтдим.

Буларни тушунмасликнинг сабаби бизда сиёсатшунослар ёки мавжуд эмас ёки соқов! Ижтимоий тармоқда сўзинг йўқми, демак сен йўқсан ва диполминг ҳам бир тийин, жамият учун хизматинг НОЛь! Мутахассислар фашизм ғояларининг тарихини ва моҳиятини, нацизмнинг мотивлари, фикрлаш дискурси ва сўз/сиёсат/иш тутиш маслакларини одамларга тушунтиришлари зарур! Бу вазифа диванний экспертларга қолиб кетибти.

Нацизмнинг асосчиси Гитлер, фашизимники Мусоллини деб чекланиб қолинган. Аслида улар ортида инглиз, франсуз, немис профессорлик минбарларида “мутафаккир” ёзувчилар бўлганлиги, уларнинг ботил ва зиёнли ғояларини ошкор қилиб одамларга етказиб берилмаган.

Албатта бу дегани советча большевистик комунизми ундан яхшироқ дегани эмас. Сил касаллиги вабодан афзал дейилмайди-ку! Аммо фарқларини ва келиб чиқиш тарихларини билиш даркор, бўлмасам улар қўйган тузоққа фаол онгли ёшлар тушиб қолади.

Кеинги гапим урушдан сўнг Германия ва Япония ўзларини тез тиклаб олганликларига таалуқли бўлади.

Агар қизиқ бўлса.

Хурмат ила,
Жамшид Муслимов.

Каримберди Турамурод: Дунёда радио жуда кўп…

Одамларимизнинг шахсий фикри йўқ! Биров сўкишни бошлаб берса, расвосини чиқариб сўкишади, мақташни бошлаб берса, маддоҳликка ўтишади.

Биттаси “Қаернинг радиоси эканини биламиз, падарига лаънат” деб юборибди.

Лаънат айтишдан олдин озгина фикр қилинг, шурадионинг озгина бўлса ҳам Ўзбекистон равнақ топишига, СЎЗ ЭРКИНЛИГИ таъминланишига, Ўзбекистонда АДОЛАТ тантана қилишига ҳиссаси қўшилаяптими йўқми? Агар қўшилмаяпти, десангиз, бурнингиздан нарини кўролмайдиган одам экансиз. Қўшилаяпти, десангиз, лаънатламанг!

Прага радиосини лаънатласангиз, Берлин радиоси, Вашингтон радиоси, Москва радиоси, Киев радиоси, Брюссел радиоси ва бошқа юзлаб радиолар қолиб кетаяпти-ку?

Прага радиосининг мақсади Ўзбекистонни обрўсизлантириш-у, қолганларники ОБРЎЛАНТИРИШми? Саволни бундай қўйишнинг ўзи нодуруст.

Дунёда радио жуда кўп. Ёққанини тингланг, ёқмаса, ўчириб қўйинг, олам гулистон!

Шахсан менга “Озодлик” радиоси неча марта мурожаат қилган бўлса, неча марта жонли эфирдаги суҳбатларида иштирок этган бўлсам, бирор марта ҳам менинг сўзларимни қайчилашмаган ҳам, бошқача талқин ҳам қилишмаган. Бир нарсани унутманглар, мамлакатимизда халқимиз фаровон яшаши учун тўсқинлик қилаётган иллатларни кўпинча ўз радиомиз, ТВ миз “Индама жим” деб турганида худди шу “Озодлик” биринчи бўлиб олиб чиққан.

Жуда кўп муаммолар “Озодлик” аралашуви билан ижобий ҳал бўлган! Марҳамат, энди мени ҳам “Озодлик”ка қўшиб, маломат қилишларингиз мумкин!

Мен адолат учун курашиб, жоним хатарда қолганида энг аввал менинг ҳимоямга “Озодлик” чиққан. Аммо ҳисбни 1:1 қилиб қўйиш учун буларни ёзганим йўқ, зеро, бугун “Озодлик” менга ўхшаган бир-иккитанинг ҳимоясига муҳтож ҳам эмас!

Каримберди Турамурод