TURONZAMIN

Hokimiyat Mirziyoevning qo’lida va to’la nazoratida

Gulnora Karimovaning daftarini ochgan kabi, otasining kitobini ham varaqlab, unga siyosiy baho berish shart.

“Shavkat Mirziyoev hokimiyatni to’la nazorat qila olmayati” degan gaplar tarqalmoqda. Bu nima degani?

Birinchidan, bu O’zbekistondagi sistema qanday qurilganini yaxshi bilmaslik oqibati bo’lishi mumkin. Chunki O’zbekistonda hamma narsa bir kishi-hokimiyatning eng tepasida turgan odamga yo’naltirilgan. Uning aytgani aytgan, degani degan. Bunga hech kim qarshi chiqa olmaydi. Qarshi chiqsa, sistema mashinasi uni bir zumda yanchib tashlaydi.

Ikkinchidan, o’zbek zehniyati ming yillar davomida shakllangan va doim bir kishining qo’l ostida yashashga o’rgangan. Tepadagi odamni avliyolashtirish illatimiz bor.

Uchinchidan, “Shavkat Mirziyoev hokimiyatni to’la nazorat qila olmayati” deyish uydirma va maxsus tarqatilayotgan bo’lishi ham mumkin. Chunki bu holatda Prezident nishondan, tanqiddan va ayblovdan chetda qoladi.

Ma’lumki, Karimov komandasi hali hokimiyatda va 25 yil davomida ahvol og’irlashib ketganini yaxshi bilishadi. Hozir biroz erkinlik berilmasa, vaziyat qanaqasiga o’zgarib ketishini ham tushunishadi. Shuning uchun qadamba qadam ish qilinmoqda va bu O’zbekistonda vujudga kelgan vaziyat va sharoit uchun qoniqarli bo’lishi mumkin.

Ammo asl erkinlik va islohotlar Karimov komandasidan keyin hokimiyat tepasiga keladiganlar davrida bo’ladi. Besh yil oldin ham, bir yil oldin ham shu fikrda edim. Bugun ham takrorllab qo’ymoqchiman.

Shavkat Mirziyoevning o’zi ham shu fikrda, menimcha. Shuning uchun yosh kadrlar kelishiga juda umidvor. Ularga yo’l ochsa, demak, Gurjistondagi kabi Shevardnaze siyosatini qilgan va millat fidoyilarini tarbiyalab chiqargan rahbar sifatida tarixga kiradi.

Bugun hamma sohada xato qilingani tan olinmoqda. Bu yaxshi holat. Buni qutlash kerak. Hamma ham xatoni tan ololmaydi. Bu mardlik belgisi. Lekin xatoni tuzatish uchun uning ildizinini topish kerak. Ildizi Samarqandga ko’mildi. Yotaversin, yotgan joyida. Biroq kimligini ochiq aytish va O’zbekistonda bugun vujuda kelgan oqibatga uning siyosati aybdar ekanligini ham tan olmasa bo’lmaydi. U chorak asr davomida xalqni “Yangisini qurmay, eskisini buzmaslik kerak” deb aldadi.

Endi eskini buzib, o’rnida yangisini quramiz, deyilayotgan ekan, Gulnora Karimovaning daftarini ochgan kabi, otasining kitobini ham varaqlab, unga siyosiy baho berish shart. Shundagini eskisi buziladi. Aks taqdirda eskini yamab, es ketadi.

Xullas, “Shavkat Mirziyoev hokimiyatni to’la nazorat qila olmayati” degan gaplarga ishonmayman. Hokimiyat uning qo’lida va to’la nazoratida.

Demak, mas’uliyat ham uning yelkasida.

Jahongir Muhammad

***

Ҳокимият Мирзиёевнинг қўлида ва тўла назоратида

Гулнора Каримованинг дафтарини очган каби, отасининг китобини ҳам варақлаб, унга сиёсий баҳо бериш шарт.

Бугун “Шавкат Мирзиёев ҳокимиятни тўла назорат қила олмаяти” деган гаплар тарқалмоқда. Бу нима дегани?

Биринчидан, бу Ўзбекистондаги система қандай қурилганини яхши билмаслик оқибати бўлиши мумкин. Чунки Ўзбекистонда ҳамма нарса бир киши-ҳокимиятнинг энг тепасида турган одамга йўналтирилган. Унинг айтгани айтган, дегани деган. Бунга ҳеч ким қарши чиқа олмайди. Қарши чиқса, система машинаси уни бир зумда янчиб ташлайди.
Иккинчидан, ўзбек зеҳнияти минг йиллар давомида шаклланган ва доим бир кишининг қўл остида яшашга ўрганган. Тепадаги одамни авлиёлаштириш иллатимиз бор.
Учинчидан, “Шавкат Мирзиёев ҳокимиятни тўла назорат қила олмаяти” дейиш уйдирма ва махсус тарқатилаётган бўлиши ҳам мумкин. Чунки бу ҳолатда Президент нишондан, танқиддан ва айбловдан четда қолади.

Маълумки,, Каримов командаси ҳокимиятда ва 25 йил давомида аҳвол оғирлашиб кетганини яхши билишади. Ҳозир бироз эркинлик берилмаса, вазият қанақасига ўзгариб кетишиниҳам тушунишади. Шунинг учун қадамба қадам иш қилинмоқда ва бу Ўзбекистонда вужудга келган вазият ва шароит учун қониқарли бўлиши мумкин.

Аммо асл эркинлик ва ислоҳотлар Каримов командасидан кейин ҳокимият тепасига келадиганлар даврида бўлади. Беш йил олдин ҳам , бир йил олдин ҳам шу фикрда эдим. Бугун ҳам такрорлаб қўймоқчиман. Шавкат Мирзиёевнинг ўзи ҳам шу фикрда, менимча. Шунинг учун ёш кадрлар келишига жуда умидвор. Уларга йўл очса, демак, Гуржистондаги каби Шевардназе сиёсатини қилган ва миллат фидойиларини тарбиялаб чиқарган раҳбар сифатида тарихга киради.

Бугун ҳамма соҳада хато қилингани тан олинмоқда. Бу яхши ҳолат. Буни қутлаш керак. Ҳамма ҳам хатони тан ололмайди. Бу мардлик белгиси. Лекин хатони тузатиш учун унинг илдизини топиш керак. Илдизи Самарқандга кўмилди. Ётаверсин, ётган жойида. Бироқ кимлигини очиқ айтиш ва Ўзбекистонда бугун вужуда келган оқибатга унинг сиёсати айбдар эканлигини ҳам тан олмаса бўлмайди. У чорак аср давомида халқни “Янгисини қурмай, эскисини бузмаслик керак” деб алдади.
Энди эскини бузиб, ўрнида янгисини қурамиз, дейилаётган экан, Гулнора Каримованинг дафтарини очган каби, отасининг китобини ҳам варақлаб, унга сиёсий баҳо бериш шарт. Шундагини эскиси бузилади. Акс тақдирда эскини ямаб, эс кетади.
Хуллас, “Шавкат Мирзиёев ҳокимиятни тўла назорат қила олмаяти” деган гапларга ишонмайман. Ҳокимият унинг қўлида ва тўла назоратида. Демак, масъулият ҳам унинг елкасида.

Жаҳонгир Муҳаммад

Filed under: 1.BOSH SAHIFA, maqolalar, Munosabat | Tagged: Jahongir Mamatov |