TURONZAMIN

Матбуотга ишониш керак

Сиз 28 декабрда имзолaган “Жисмоний ва юридик шахсларнинг мурожаатлари билан ишлаш тизимини тубдан такомиллаштиришга доир чора-тадбирлар тўғрисида”ги Фармон бу соҳада кескин ўзгартириш қилишни назарда тутган. Жумладан, вилоятларда президент Девонининг қабулхонасини очиш яхши ниятнинг ифодасидир.
Аммо ўзбек зеҳниятига кўра, бу унчалик фойда бермайди. Чунки Девондан маош олиб, вилоятда ўтирадиган одам ўзини кичкина президент ҳисоблаб, вилоятдагиларни оёғининг учи билан кўрсатиши, унга ёқмаган маҳаллий раҳбарни тепага ёмон кўрсатиши, устидан шикоятлар уюштириши каби ҳоллар юз бериши мумкин.
Икки қўчқорнинг боши бир қозонда қайнамайди дегандек, икки ҳокимиятчилик рўй беради.
Баъзи ҳолларда эса маҳаллий ҳокимлар билан тил бириктириб мурожаат қилган одамни синдиришлари, унга туҳмат уюштиришлари ва қамаб юборишлари ҳам юзага чиқади.

Бу эса ишлар олдинга эмас, орқага кетишига, эндигина пайдо бўла бошлаган ишонч учқунлари йўқолишига олиб келади.
Қолаверса, бу ҳол халқаро доирада диктатурани кучайтириш, вертикал назоратни ошириш деб баҳоланишига, Ўзбекистон номига яна танқидлар кўпайишига ҳам йўл очади.
Буларнинг ҳаммасидан қутилишнинг йўли бор. Шикоятлар назоратини матбуотга топшириш керак. Халқимиз зеҳниятига кўра, президент томонидан ишдан олинишдан ҳам оммавий танбеҳ оғирроқдир.
Матбуот-оммавий танбеҳ минбари. Шундай экан, Матбуот ҳақидаги қонунга бир жумла ўзгартириш киритиб, матбуот халқ муржаатлари ижросини текширишига ва мунтазам ёритишига йўл очилса, ташвиш енгиллашади, ишлар олдинга кетади, халқ билан ҳақиқий мулоқот бошланади.

Filed under: 1.BOSH SAHIFA |