ЖАҲОНГИР МАМАТОВ

ИШОРАТЛАР
ТАНГРИНИ СУДГА БЕРДИ

Дунёдаги энг диндор санaлган АҚШнинг Небраска штати сенатори Эрни Чамберс (Ernie Chambers) инсониятга энг кўп зарар-зиён етказган дея Тангрини судга берди. Кимдир уни тентак дейиши мумкин эди. Дейишмади. Чунки у тентак эмас. Халқ эътиборини қозониб, сенатор бўлган. Лекин Ўзбекистонда ёки Шарқнинг бошқа жойларида бўлса, уни жиннига чиқарган ёки шайтон, кофир дея ўлдириб кетишлари ҳеч гап эмас.

Қолаверса, сенатор баъзи сафдошлари – қонун чиқарувчиларнинг айрим ахлоқий, нозик масалаларни судга олиб чиқмаслик борасидаги ҳаракатларига қаршилик кўрсатиш мақсадида шундай одим отганини айтади.

У Си-Эн-ЭН (CNN) га берган суҳбатида ҳар қандай киши ҳар қандай масалада судга мурожаат қила олиши кераклиги ва буни бўғмаслик шартлигига урғу берди.

Унга кўра, ҳамма нарсага қодир деб билинган Тангри юз бераётган зилзилалар, табиий офатлар, урушлар ва бошқа оммавий қирғинларнинг олдини олмаганмиш.

Мени эса бошқа нарса ўйлатди. Тангри битта. Фақат уни турклар Тангри, араблар Аллоҳ, форслар Худо, руслар Бог, инглизлару немислар Год, французлар Дью, италянлар Дио, Испанлар Диос ва ҳоказо номлар билан аташган. Шундай экан, демак у ҳаммамизнинг Тангримизни судга берди.

Аммо нега ҳар уч динда ҳам сал нарсага пайғамбарларни ҳимоя қилишга чоғланганлар Тангрига қолганда лом-мим демадилар?

Балки Тангри гуноҳкор бандаларнинг муҳофазасига, ҳимоясига муҳтож эмас, дейишингиз мумкин. Ҳақсиз.

У ҳолда Тангрининг пайғамбарлари заиф бандаларнинг муҳофазасига муҳтожмилар?

Худбин инсоннинг ўзини Тангрининг пайғамбарларидан ҳам устун қўйишга интилиши эмасми бу?

ЯРАТГАННИНГ ИНОЯТИ

Сунбула келдими, Америка табиатида мўъжиза кунлар бошланади. Дарахтларнинг барглари сап-сариқ, қип қизил, кўм-кўк ва биз сўз билан ифода этолмайдиган даражада ажиб рангларда товланиб эртаклар диёрини яратади. Шундай кезларда қалин ўрмонлар билан қопланган тоғлар яқинига борсангиз, табиатнинг гўзаллиги қаршисида лол қоласиз.

Мен севган бир тоғ бор. Бизнинг уйдан анча узоқларда. Шаҳар атрофида яшаганимиз учун ўша тоғ бағрига бориб келиш анча вақт олади. Ҳар доим ҳам у томонга йўлим тушмайди. Лекин ҳар куни бир бориш истаги кўнглимни тарк этмайди. Куз тушдими ҳеч қандай сабаб бўлмаса ҳам ўша томонга қараб кетгим, ўша тоғ бағридан ўтган йўллардан уфқ остонасига қараб етгим келаверади.

Тоғлар ва ўрмонларга ошиқлигимни уйдагилар ҳам билишади. Аммо кимнинг иши, кимнинг ўқиши дегандай ҳар куни ҳам ўша томонларга бораверишимизга имкон йўқ эди.

Қайси йили ҳам туғилган кунимда болалар уйни худди эртаклардагидек қилиб тузатишиб, тортнинг устига кичик шаъмларни ёқиб׃

-Аввал ният қилинг, кейин пуфлаб ўчиринг,-деб қолишди.

Шунақа одат эмиш.

Ният қиламан десам кўз олдимга ложувард- ранго ранг ўрмонлар, ўша мен ошиқ бўлган тоғ ва дарахтлардан бахмал тўн кийган қоялари келаверди.

“Тез-тез ўша томонларга бориб-келиб турайлик” дедим ичимда.

Қилинган ниятни айтмаслик керак экан. Мен эса айтиб юрдим. Чунки ошиқ ўз севгисини яшира олмагани каби мен ҳам табиатнинг гўзаллигига шайдо эканлигимни айтмасдан тура олмас эдим.

Эгизак фарзандларим мактабни битиришиб, олий ўқув юртларига ариза беришди. Шу жойда муаммо бошланди. Чунки улардан бири журналист, кейингиси эса тиш доктори бўлмоқчи. Бир университетда журналистика бор, иккинчиси йўқ. Охири яхши бир университетда бирга ўқийдиган бўлишди.

Дунёнинг ишларини қаранг. Бирданига икки истак эмас, балки уч орзу ҳал бўлди. Энди мен ҳафтада ё икки ёки уч марта ўзим севган ўша тоғ ва ўрмон қўйнидан машинада бир неча соатлаб ўтиб боришим шарт.

Кеча машина рулини турмуш ўртоғимга бериб, ўзим табиатнинг гўзалликларидан кўзимни уза олмай келар эканман, ана шу ҳақда ўйладим. Яхши ният-ёрти мол деганлари бежиз эмас экан! Яратганнинг иноятига яна бир марта қойил қолдим!

Advertisements

About TURONZAMIN

supporter of democracy
This entry was posted in 1.BOSH SAHIFA, Ishoratlar, Shu kunning gaplari, Uzbek. Bookmark the permalink.

One Response to ЖАҲОНГИР МАМАТОВ

  1. musafir says:

    Assalomu alaykum Jahongir aka,

    Tangrini sudga berish voqeasi biroz qiziq, ruhiy sog’lom odam uchun noodatiy holatdir. Ochig’i bu yerda Nebraska Shtat Sen. Erni Chambers biroz mantiqqa noloiq ish qilgan. Birinchidan, u xudojo’y shtatdan bo’lsada, mutlaq xudosiz odam. U haqida Wikipediada ateist deb beradi:http://en.wikipedia.org/wiki/Ernie_Chambers . Mantiqqa asoslansak , Tangriga ishonmagan odam qanaqa qilib uni sudga berishi mumkin. Ya’ni o’zi yo’q deb bilgan voqeilikni sudga berayapti.
    Ikkinchidan, u xudojo’y bo’lgan taqdirda ham ko’pchilik bo’layotgan talofatlar insoniatning xatosi oqibatida vujudga keldi. Va u dunyo bir sinov, bo’layotgan tabiiy ofatlar insoniat uchun jazo deb o’yalagan bo’lar edi. Insoniat tomonidan sodir etilgan va etilayotgan voqealarni barchamiz bilamiz va har kuni ko’rib turibmiz.
    Men Xudoni himoya qilayotganim yo’q, va o’zingiz aytganingizdek, U bunga muhtoj ham emas. Uning payg’ambarlari ham himoyaga muhtoj emas, Tangirini o’zi himoya qila oladi, lekin Evropada bo’lgan voqealar chegarasidan chiqqan edi, ya’ni payg’ambarni karikaturasini chiqarib butun shu din vakillarini haqorat qilishgan edi.
    Agar Chambers ishiga qaytsak, bir narsa meni quvontiradi. AQShda hamma mustaqil fikrga ega va shu fikrni har kim ifoda eta olish huquqi ham kafolatlangan. Albatta, Chambersga qarshi chiqqan, uni yoqlaganlar ham ko’p. Umuman, bu yerda fikrga qarshi fikrlar ham turlicha.
    Jahongir aka, kuni kecha Florida Universitetida sodir bo’lgan voqea xususida fikringiz qanday? Ya’ni 21 yoshli Andrew Meyerni Sen. Kerry bilan uchrashuvda politsiya tomonidan hibsga olinishi haqida.
    hurmat bilan “Musafir”.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s