ЮСУФ ЖУМА
Ё арслон бўлган, ё бургут бўлган
Жайҳуннинг сувидан ичган йигитлар.
Гўрўғли мисоли эр йигит бўлган
Жайҳуннинг сувидан ичган йигитлар.
Буюк Жалолиддин, Нажмиддин Кубро
Ҳам ботир, ҳам шоир, улуғ авлиё
Ўтган ҳар томири бир Амударё
Жайҳуннинг сувидан ичган йигитлар.
Нечун лочин каби првозда Ғирот
Тошқин сувларидан ичган содиқ от,
Фироғий шеъридай чиқарган қанот
Жайҳуннинг сувидан ичган йигитлар.
Букун ҳам бормисиз, нетаётирсиз,
Ёв берган суякни тотаётирсиз.
Маҳмуд Ялавочдай сотаётирсиз
Жайҳуннинг сувидан ичган йигитлар.
Бағрим хомталашдир, тилкалатдингиз,
Золимнинг отини эркалатдингиз.
Юсуфни душманга яккалатдингиз
Жайҳуннинг сувидан ичган йигитлар.
Эр умрига умр яратган қўшсин,
Амударё кўнглим мисоли жўшсин.
Суви кўзингизни қон бўлиб тешсин
Сарой сарқитига учган, эй итлар!
2007.
