Тугри карор хамиша тугри натижаларнинг гарови булган… ёки деярли шундай…
Бир гап айтмокчиман. Гарчи олдиндан унинг кандай акс садо беришини билсам хам айтаман. Сиздан нима кетди, сиз хам эшитиб куяколинг. Аммо кизик гап.
Хуллас муддаоим шуки, келаётган сайловларда хаммани Ислом Каримов учун овоз беришга чакирмокчиман. Хайрон колманг, уйлай-уйлай билдимки, шу иш энг тугри иш буларкан. Тахлил килиб сездимки, аслида бу одам хамма вакт борини гапириб, намойиш этиб келган, ва хатто келажак хакда хам тугри башорат килган. Бас шундай экан нега уни сайламаслик керак?
Каранг, президент ва булажак президентнинг доим такрорлайдиган бир гапи бор, яъни «Узбекистон келажаги буюк давлат» деган. Кани айтингчи, бу гапда ёлгон борми? Кани уша ёлгон? Киноячи? Униси хам, буниси хам йук. Аммо хакикат бор. Исботлаб берайми? Мархамат.
Узбекистоннинг келажаги, деганда боринг ана ун йилдан кейин ёки йигирма йилдан кейинги Узбекистонни тасаввур килайлик. Айтингчи уша пайт келганда, мамлакатда узгаришлар юз бериб, анча енгил нафас ола бошлашимизга ишонмайсизми? Бугун нафасимизни бугиб турган айрим «холат»лар уша пайтларга келиб, нима десам экан, халигидай булишига ишонасизку ахир, тугрими? Демак келажак хакдаги башоратида президентимиз муболага килмаяптимикан?
Яна бир ишорасини эслатайми? «Биздан фарзандларимизга озод ва обод ватан колсин» деган президентимиз. Кани айтинг, мана шу сидкидилдан айтилган хайрли ният учун бу инсонни севмай буладими? Кайси мамлакатда шундай умид уйготилаяпти. Масалан Россияни олинг, теппада бундай башоратлар вообщем йук, Белоруссияни олинг, тоже йук. Озарбойжон, Чеченистон, Хитой, йукми? Йук! Туркманистон президенти масалан шунга ухшаш башоратлар киларди, нима булди, почти амалга ошаяптими? Баракалла!
Президентимиз аник айтаяптиларки, биздан кейин, фарзандларимизга ОЗОД ва ОБОД ватан колдирамиз, деб. Ахир биздан кейин дегани, биз кетгач, улгач (мен факат тахлил килаябман, аник тилак изхор килмаябман), бир жойларга кучгач, деган маънони англатади, тугрими? Учала маънонинг хам битта натижаси бор, у хам булса бизсиз деган ишора. Хуш, айтингчи уша назарда тутилганлар кетгач мамлакатнинг ОЗОД ва балким хатто ОБОД булиши бор гапми йукми? Бунга шубхаси борлар бугун президентимизни ёмон куриб у кишига карши булаяптида. Кетмасин, колсин, озод хам булмайлик, обод хам дейишаяптида.
Президентимиз эса ишора килгани ишора килган. Кани энди тушунсак. Каранг айтиб турибди, «Фарзандларимиз биздан кура, кучли, билимли, доно ва албатта бахтли булишлари шарт», деб. Яъни жаноб президентимиз очик ойдин ишора килаяптиларки биздан кура кучлирок, билимлирок, донорок булмаса тамом, масала расво деб. Маълум маънода билимимиз хам, донолигимиз хам мундайрок чикди, бахтимиз хам не очень, кучимизнику гапирмасак хам булади, деб тан олаяптилар, бизчи? Йук, ундай эмас, ёлгон гапираяптилар, гирт диктатор деб бакириб ётибмиз, тавба…
Президентнинг мазкур гапида аник йуналиш берилаяпти, биздан кура кучлирок булинглар, донорок булингларки, токи койил колиб жойни бушатайлик демокчилар. Бизнинг билимимиз ва махоратимиз билан узокка бориб булмаслиги, зеро бу билим ва махорат шубхага тулалигини билдириб куйяптилар. Тавба бу хам ёлгонми? Мундок мушохада килингчи? Эркаклардан умидини йукотгач, шурлик президентимиз аёлларга мурожаат килиб юбордия. Сунгги чикишини эсланг, «бу гапларни англаб уларни тугри етказиш, халк орасида тушунтириш осон иш эмас», деди. Айримлар хали хам тушунмай утирибди, деб куюнди.
Тугри, баъзан биз тушунмай, узимизча хар хил гумонларга борганимиздан сунг, хафсаласи пир булган президент, очик ойдин ишоралар килиб юборди. Зеро кимдир тушуниб, тугри хулоса чикариб уловни олиши керакда ахир. Нима деди биласизми, «Юксак маънавият, буюк келажак пойдевори», деди. Каранг, ишора килаяпти, маънавиятни тугриланглар, анави ярим ялангочларга ишонманглар, биз ечинтириш билан овора, сиз кийинтиринг. Зеро ечинтириб булганимиздан сунг, кейинги стадияга утсак, уже маънавитяни эслашнинг хожати колмайди, хув Холландиядаги кучаларни тулдиришимиз керак булиб колади, деб турибдилар.
Йук, тушунмадик. Хали хам тушунмаябмиз. Овмимизда. Каранг, тушунмаганимиздан куюнган президент, нидо килаяптики, «Факат кудратли миллат буюк ишларга кодир», деб. Нимага ишора килаяпти, сездингизми? Мунча эзмаланмасанглар, ахир бир куч булиб шартта «буюк ишларга» киришмайсизларми, хит кивордиларингку, деяпти. Биз бу ёкда унинг маъносини укиб етгунимизча, президентнинг атрофидагилар тушуниб, чунонам кудратини намойиш килаяптики, просто гап йук.
Ана сайлов масаласида хам ишора килиб утди, очик ойдин чакирик хам килди. Хуш? Ахир узимиз шуни хохламасак президентда нима айб? Айтиб турибди, «сайловни халкаро меёрлар ва Конституция асосида утказайлик, хаммани догда колдирайлик, бир курсатиб куяйлик, ахир», деб. Нима хулоса килдик? Барибир узи булиши аникку, кучаниб нима килдик, дедик. Тавба, президент ахийри хафа булиб, хатто куриниш бермай куйди. Каранг хамма номзодлар телевузорда чикиб, бир нарсаларни гапирди,журналистнинг чаласавод саволларига чаласавод жавоб хам беришди. Президентчи? Чикмади, э-э, борларинге, деб кул силтади. Хафа булдида.
Хуллас хеч нарсани тушунмай, аник ишораларни англамай мингирлаб келмокдамиз Отахон бир пайтлар айтган эди, «мен хам чойхонага чикиб, чоллар каторида утиргим келаяпти», деб. Шу-шу, хамма чойхоналарни ёпиб ташладик, кетиб колсая, деган гумонда. Бирортамиз журъат килмадикки, отахон мана бизнинг чойхона сизга мунтазир, келинг, керак булса чолларни хам топиб берамиз, утиринг чой ичиб, чойнинг зури бизда, ана Ахмат дегани бор, деб айтолмадик. Тавба.
Шунга карамай президентимиз хар сафар «буюк келажакка албатта етасиз», «барча мамлакатлар катори албатта кучаясиз», деб такрорлдайди, бир сафар хатто «эрталаб туриб, тахорат килиб дуо килинглар, шуларни сураб», деган эди. Шу-шу хамма намозхонларни камаб ташладик, ростдан лдуо киворишсая, деб. Мусулмонликни даъво килаётган миллатда камалганлардан бошка дуо кила оладиганлар йук шекилли, дуо килинмаяпти, чойхонага бориш истагидагилар эса, хув Крылов айтмокчи «и ныне там»!
Эртага муборак кун, хаммамиз дуо киламиз. Мен сизларни президентимизнинг анави сузлари инобат булсин дея дуо килишга чакираман. Келажагимиз буюк булиши учун, ОЗОД ва ОБОД ватан учун, фарзандлар билимлирок, кучлирок, донорок булиши учун дуо килайлик. Биздан нима кетди. Маъкулми?
Иброхим Назаров, “Туронзамин” учун.
