Бухоро вилоятининг Қоракўл туманидаги беш юз кишини иш билан таъминлаб турган бахмал ва бўз тўқиш фабрикаси йиқитилиб сотилди. Негалигини ўргансак томидан сув ўтди деб сотилган экан.
Аслида эса бу фабриканинг томини арзимаган пулга ремонт қилиш ва уни ишлатиш мумкин эди. Бироқ бундай бўлмади. Қоракўл туманида ҳокимлик қилиб турган Матлуб Нуъмонов ва Қоракўл тумани ИИБ бошлиқлари бу фабрикани қандай қилиб йиқиб сотишни мўлжаллаётганларига шипдан бир икки томчи ёмғирнинг ўтиши катта баҳона бўлган.
Фабрика йиқиб сотилди, тушган пуллар давлатга эмас Матлуб Нуъмоновнинг чўнтагига келиб тушди. Фабриканинг биносидаги яроқли материаллар эса Ҳоким Нуъмонов ва ИИБ бошлиқлари яшаётган туманга—Ғиждувонга олиб кетилди. Бир гектардан ортиқ майдонни эгаллаб турган фабрика ўрнида ҳеч нарса қолмади.
Ҳозирги кунда эса фабрика жойлашган ерни одамларга ким ошди савдоси билан уй теки учун сотишяпди. Аслида эса ким ошди савдоси номига ўтказиляпди. Ер таниш билишчилик ва катта пул эвазига маълум одамларга берилмоқда.
Катта фабрика ўрнида яқинда одамларнинг уйлари ўрин олади. Ишсизликдан кўчада қолганлар эса Россия ва Қозоғистонга мардикорчиликка ва фоҳишаликка кетмоқда. Мамлакатда ишсизлар сонинг кўпайиши ва халқнинг дарбадарликка маҳкум этилганининг сабаби эса Ўзбекистонда фабрика ва заводларнинг қурилмаётгани, аксинча бори ҳам йиқиб сотилаётганидадир.
Биз фабриканинг нима сабабдан сотиб ўзлаштириш сабабларини сўраганимизда эса Бухоро вилоят Мулк қўмитаси фабрика Президентнинг фабрикаларни ривожлантириш дастури асосида йиқиб сотилган деди, қўйди. Наҳотки, Президент ривожлантириш керак деса уни йиқиб сотиш керак?!
Биз қаердан ҳам билардик, Президентнинг фармонлари маъносини, унинг шотирлари биладида. Ахир қарийб йигирма йилдан буён «Ўзбекистон келажаги буюк давлат» деб айтадию, энг тубан жарликка қараб кетаётганимиз президентнинг амалдаги сўзларининг фақат тескари маъноси ҳақиқийлигини англаб етишимизга ёрдам беради.
Айтилган сўзларнинг тескарисини тушиниш лозимлигини фақат «Ёлғончилар мамлакати» эртагида ўқиганман. Букун биз ҳар бир сўзнинг тескари маъносини англаб етишни ўрганишимиз керак, Ҳа, Жанни Родарининг «Ёлғончилар мамлакати» эртагидагидек.
